I bin die Großhaupt Frieda,/ in Gruab bei Lemba geborn./ Vo meine braven Großeltern/ bin i dort afzogn worn./ Bin in an Baunhaus afgwachsn,/ hab de ganz Baunarbat tan,/ des meiste nu händisch,/ was si heit kaum wer vorstelln kann,/ s'Men, s'Mah und s'Dreschn/ hab i alls nu mitgmacht,/ vo da Friah an sche drawi/ bis ei in de gschlagn Nacht./ Bin dann fortkemma in d'Studi/ zu de Kreuzschwestern af Linz,/ warn fünf Jahr fest zan Stucka,/ weil ma kriagt nix umasinst./ Als Lehrerin kenn i Kirchberg/ und Heinrichsberg obn,/ dana dann a Salasba,/ wo i heut nu allweil wohn./ Hiatzt gehör i za de Rentner,/ aber fad wird mir gar nia!/ I probier halt öfters s'Dichtn./ So, hiatzt wißts alls vo mia.