IH MECHT Ih mecht, mecht übers Lesn lesn, übers Schreibm schreibm, übers Redn redn, übers Lerna lerna, übers Denga denga, übers Dichtn dichtn. Doh oans, oans mecht ih, mecht ih nia - übers Stottern lacha. VAGÄNGLIH Da Tag fallt rot ins Meer, legt de letztn Strahln ums Heint. A kalte Nacht ziahgt d' Wärm aus de schen Stundn. Und morgn in da Fruah is 's Heint scho wieder gestern.

VAN ARBATN Wann olle so langsam arbatatn, wias du dengst, dann dengatn olle Arbater: Guat, dass der dengt und net arbat't. WISSN De oan wissn net, was s' toan, und de andern toan net, was s' wissn. Doh a jeder woaß, was er tat, wann er wissat, dass da ander woaß, was er tuat. NET GLAUBM WOLLN Er hat's net glaubm wolln. Er hat's oafach net glaubm wolln. Er hat oiweil gsagt: "A wengerl sterbm - de gibt's oafach net." Seit s' eahm aber sein Wülln brocha habm, is er a wengerl gstorm.