Selbstgefälligkeit

Was san des netta für a Leit,/ recht gschaftlhuaberisch und gscheit/ und auf eah Gscheitheit san's vasessn/ als hättn se's mit'n Löffl gfressn.// Überrall gen se eahn Senf dazua,/ denn san's ah nix, se wissn gnua,/ a jeder andre is doh bled,/ mit dem ma liaber gar net redt.// Erfahrung? Na, de is net wichtig,/ de eigne Meinung, de is richtig,/ a andre lassn's gar net geltn,/ Verständnis für an andern seltn.// Mir kimmt des vür, ih täusch mi net,/ wia wann da 's Oa vorn Hendl geht:/ "Schauts her" - so kraht es - "des bin ih,/ vor mir war nix, kikeriki!"

Gedanknsplitter

So mancher, der oaner Latschn ausweicha wollt, is en Dreck einigstiegn.

Gedanknsplitter

Älter wird ma von selber, gscheiter net.

Gedanknsplitter

A scheni Musi fangt erscht da an, wo da Krawall aufhert.

Gedanknsplitter

Da is oana, der moant, er is wer. Daweil is er ganz kloakariert bliebm.

Gedanknsplitter

An hinterfotzign Menschn siahgt ma's net an, was er hinter sein freundlichn Gsicht denkt.

Gedanknsplitter

Da moant da Mensch, er hat de Technik en Griff, daweil hat de Technik eahm en Griff.

Gedanknsplitter

D'Zeit is so schnellebig wordn, daß fast koa Zeit zan Lebm bleibt.

Gedanknsplitter

Ma soll a woachs Herz net mit oana woachn Birn vawechsln.

Gedanknsplitter

Es is net leicht an Menschn d'Hand z'gebm, wann ma eahm's liaber en's Gsicht druckat.

Gedanknsplitter

Oft steckt hinter an Brett a ganzer Kopf.