GEGNAN STROM 's Wasser rinnt netta berga(b). 's Wasser rinnt oiweil netta berga(b). Es nimmt Meinungen und Ansichten mit. Drum is's so schwar, gegnan Strom zan schwimma. UNWISSNHEIT Unwissnheit is da geistige Leeraum, zwischn Dummheit und Faulheit. Warum der Bereich so groß is, woaß ih ah net. SCHLECHT TROFFA Da Jaga schiaßt - 's Reh fallt um. Da Jaga schiaßt nuh amal - 's Reh fallt nuh amal um.

FRIEDNSTAUBEN Fliag, kloane Taubm, weiße Taubm, Friedenstaubm. Fliag auffi in Hümmi, fliag aussi in d' Welt. Fliag hin za de Leit, de mordn und kriagführn und bring eah en Friedn, en ewign Friedn. Doh wann de Leit af dein' Friedn pfeifn, dann halt amal stad, nimm dein ganze Kraft zsamm und scheiß eah wenigstns afn Kopf. STREITN Da Mann sitzt in Arbatszimmer - und redt nix. D' Frau sitzt in da Küch - und redt nix. D' Schwiegamuatta sitzt in Wohnzimmer - und redt nix. Und trotzdem sagn d' Leit, dass de drei den ganzn Tag netta streitn.