Was zun ausprobiern

In Ehestand gibt's oft a Gscher!/ A Streit kam über d' Nacht daher./ Sobald mei Mann an Ärger gspürt,/ aft schau ih gleih, daß's lusti wird./ Aus is's! Ih bin entsetzlih schlecht./ Derschiaß mih doh! Iazt waa(r)'s mar recht./ Koa Schuß is z'hörn den ganzn Tag!/ Ih hab's ja gwißt, daß er mih mag.

Irgendwo is allweil wer

Irgendwo is allweil wer,/ der ganz seltn lacht./ Den sein Lebm, a so, wia's is,/ gar koa Freud mehr macht./ Irgendwo is allweil wer,/ der oft trauri wird./ Der vor lauter Abitoan/ schier in Kopf valiert./ Irgendwo is allweil wer,/ der an Hunger hat./ Der ah heut nuh dankbar is/ für an Bissn Brot./ Irgendwo is allweil wer,/ der koa Liab net kennt./ Der langmächti eingsperrt war/ und sein Nam net nennt./ Irgendwo is allweil wer,/ den's enttäuscht hat, s' Lebm./ Ah für den, ih moan halt schon,/ muaß's a Hoffnung gebm./