Inser alts Basei

In Jahr 1898 is inser Basei geborn. Drum hat’s ah fest glaabt, daß sie noh vom alten Testament stammt. Und daß sie ah an andern Magn hat, als mir hamb. Gar oft hats gsagt: „Was ös für an Durcheinander zsamm-eßts, des kunnt ih nit toan, weil ih hab an unterteiltn Magn mit vier Kammern, Drum muaß ih alls getrennt essn. Zerscht die Suppn, nachher d’Hauptspeis, als dritts die Beilag und z’letzt an Salat. Daß alls in de richtige Kammer kimbt! Ös habts grad an Sackimagn, da is s’ja gleich, wanns alls durcheinander eßts.“

Ih brauch Dih

Du werscht ma(r) ’s nit wehn, ih brauch dih zan Redn. Zan Tröstn dein Liab, weil ’s Lebn is oft trüab. Dein Wort hat an Klang. für mih wia a Gsang. Du gibst mir de Kraft, mit der ma alls schafft. Alloan dein Vertraun, auf des kann ih baun. Du kannst ma(r) alls gebn, mit „Dir“ mecht ih lebn.

Geographie

In der Geographie hat ’s Basei halt an Schwachpunkt g’habt. Sie is ja in ihrn Lebn nia über d’Salzburger Grenz außekema. So hat sie ah nit wissen kina, wo die weitern Bundesländer angrenzen. Da hat bei uns amal a Frau aus Vorarlberg Urlaub gmacht, mit der sih ’s Basei guat unterhaltn hat, und unter andern a gfragt hat, wo sie denn dahoam is? Da hat ihr die Frau gsagt, daß sie von Vorarlberg is, drauf hat’s Basei wieder gfragt: „Wo is eigentlich Vorarlberg, is des in Kärntn oder in da Steiermark?“ Wia ihr de Frau erklärt hat, daß des a eigenes Bundesland is und bei Tirol angrenzt, hat’s Basei gsagt: „Aber des werd eh als oan Gemeinde sein!“